cuandu cruzu pola plaza
entri callis de silencius
al dispertal la mañana.
Respiral, mientris que pasu,
el roci de las palabras
del sentil de la mi genti
cuandu se abrin las ventanas.
Quieru escuchal en el airi
los pajarinus que cantan
cumu corus mañanerus
en los tejaus de las casas, .
el vieju cantu del cucu
cuandu amaneci la calma,
o en los charcus de los vallis
el caraqueu de las ranas.
Quieru respiral mi campu,
los vaivenis de la ramas
el pardu de las encinas,
el silviu de las retamas,
el azul puru del cielu,
el verdi en flol de las jaras,
i el besu de las estrellas
cuandu la tardi se acaba.
Quieru respiral lo hondu
del sentil de la mi raza:
gentis que vinun soñandu
pol vereas de esperanzas
pa sembral en estas tierras
la simientis de sus ansias
Quieru respiral mi pueblu
ca ve que respiru el alba
i me dispiertu soñandu
caminus de vuelta a casa
pa corazonis ausentis
de una tierra que los llama,
cumu una madri que estiendi
el cobiju de sus haldas.
Que no se borri el soniu
que en mi pueblu se esparrama ,
que no se borrin las notas
con las que mi pueblu canta;
no le apagueis a mi pueblu
la lumbri de esta esperanza,
pol que mi pueblu es el airi
con que respira mi alma.
Cruz Diaz
